करमळीतील बंधार्यांची फळदेसाईंकडून डागडुजी, शेतकर्यांकडून १० वर्षांनंतर लागवडीला सुरुवात.
पणजी : बंधार्यांच्या दुरुस्तीचे काम पूर्ण झाल्याने सावत करमळी येथील शेतकरी शेती करू शकतात, असे गोवा पुनर्वसन मंडळाचे अध्यक्ष तथा कुंभारजुवाचे आमदार राजेश फळदेसाई यांनी बुधवारी सांगितले. फळदेसाई यांच्या पुढाकारामुळे युद्धपातळीवर दुरुस्तीचे काम हाती घेण्यात आले होते. तळे सावत असोसिएशनच्या बंधार्याची दुरुस्ती पूर्ण पावसाळ्यापूर्वी पूर्ण केल्याने शेतकरी लागवड करू शकणार आहेत. जलसंपदा विभागाच्या माध्यमातून हे काम करण्यात आले आहे, असे आमदारांनी सांगितले.सुपीक जमिनीतील शेतीचे पुनरुज्जीवन करण्याचे, तसेच वाढत्या पाण्याच्या पातळीपासून असुरक्षित भागाचे संरक्षण करण्याचे आश्वासन आमदारांनी दिले होते. ते त्यांनी पूर्ण केले.
‘बंधारे फुटल्याने करमळीतील शेत पाण्याखाली गेले होते. त्यामुळे आम्ही या भागात शेतीची कामे करू शकलो नाही. आता बंधार्यांची पुनर्बांधणी करण्यात आली आहे. त्यामुळे शेतकर्यांनी तब्बल 10 वर्षांनंतर लागवडीस सुरुवात केली आहे, असे लक्ष्मण काणकोणकर या शेतकर्याने यावेळी सांगितले. शेतात नदीचे पाणी शिरले होते आणि आता आमदारांनी मदत केल्यानंतर आम्ही शेती करण्यासाठी पुढे आलो आहोत. आम्ही इतर शेतकर्यांनाही त्यांच्या शेतात पेरणीसाठी बोलवू, असे काणकोणकर म्हणाले.
शेतकर्यांनी आपल्या शेतात शेती करावी, असे आवाहन फळदेसाई यांनी केले. काल निवडणुका झाल्या आणि आज आम्ही कामे हाती घेण्यास सुरुवात केली आहे. सुमारे १० वर्षे शेतकरी शेती करू शकले नाहीत, पण आता आम्ही बंधार्यांची दुरुस्ती केल्यानंतर ते शेतीसाठी पुढे सरसावले आहेत. मुख्यमंत्री प्रमोद सावंत हे नेहमीच शेतकर्यांना शेती करण्यासाठी प्रोत्साहन देतात. कृषीमंत्रीही आम्हाला शेतात शेती करण्यासाठी प्रोत्साहन देत असून ते भविष्यातही मदत करतील, असे ते म्हणाले.
येथे सुमारे ३० शेतकरी आहेत आणि मी त्यांना माझ्याकडून सर्वतोपरी मदत करण्याचे आश्वासन दिले आहे, मग ते ट्रॅक्टर असो किंवा लागवडीसाठी इतर खर्च. आपल्या शेतात उत्साहाने पेरणी करावी. आज आम्ही त्यांना प्रोत्साहन दिल्यानंतर ते बाहेर आले आहेत. आम्हाला या शेतांची लागवड करायची आहे. त्यांना सरकारकडून जी मदत हवी आहे, ती आम्ही देऊ. त्यांच्या मदतीसाठी मी स्वत: पुढे आलो आहे. शेती महत्त्वाची असल्याने इतर शेतकरीही पुढे आले तर मला अधिक आनंद होईल. आम्ही अधिकाधिक शेतकर्यांना प्रोत्साहन देत राहू. शेतकर्यांनी वर्षातून किमान दोनवेळा पिकांची लागवड करावी, असे आवाहनही त्यांनी केले. मतदारसंघात अशीच कामे करणार असल्याचे आमदारांनी सांगितले असून ही कामे प्राधान्याने करण्यासाठी पूर्ण सहकार्य करण्याचे आश्वासन जलस्त्रोत मंत्र्यांनी दिल्याचे फळदेसाई यांनी शेवटी सांगितले.
